Арменияның премьер-министрі Никол Пашинян үкіметтің отставкаға кетуі туралы өтінішке қол қойды. Бұл шешім елде жаңадан сайланған Ұлттық жиналыстың алғашқы отырысының басталуына байланысты қабылданды, деп хабарлайды Qaznews.kz.
Пашинянның айтуынша, Армения Конституциясының 158-бабына сәйкес, Ұлттық жиналыстың жаңа шақырылымының алғашқы сессиясы ашылған күні үкімет өз өкілеттігін тоқтатуға міндетті. Осы талапқа сәйкес премьер-министр президент Ваагн Хачатурянның атына үкіметтің отставкасы туралы өтініш жолдаған.
Сонымен бірге Пашинян министрлер кабинеті жаңа құрам жасақталғанға дейін өз міндеттерін атқара беретінін айтты.
Конституцияға сәйкес, жаңа парламент жұмысын бастағаннан кейін парламенттегі көпшілік президентке премьер-министр лауазымына кандидат ұсынады. Президент Конституцияның 148 және 149-баптарына сәйкес ұсынылған кандидатты үкімет басшысы қызметіне тағайындайды.
Айта кетейік, парламент сайлауында Никол Пашинян жетекшілік ететін «Азаматтық келісім» партиясы жеңіске жетіп, Ұлттық жиналыста 64 депутаттық мандатқа ие болды.
Осылайша, бүгінгі үкіметтің отставкасы саяси дағдарысқа немесе биліктің ауысуына байланысты емес. Бұл – Армения заңнамасында көзделген рәсімдік қадам. Жаңа үкімет жасақталғанға дейін қазіргі министрлер кабинеті өз жұмысын жалғастыра береді.
Фото: Thomas Trutschel / www.imago-images.de / Global Look Press
