Жол активтері сапасының ұлттық орталығы Алматыдағы Л.Б.Гончаров атындағы Қазақ автомобиль-жол институтының қолдауымен 7 жоғары оқу орындарының студенттері арасында ауқымды сауалнама жүргізді. Мақсаты – жастардың болашағы олардың таңдаған мамандығымен байланысын анықтап, студенттерді осы салаға тарту. Сауалнамаға 1-4 курс арасында 225 студент қатысты.
Мамандық таңдаудың негізгі себептері
“Неліктен жолшы мамандығын таңдадыңыз және ақпаратты қайдан алдыңыз?” деген сұраққа респонденттердің көпшілігі жауап берді:
• Масс-медиа және әлеуметтік желілер арқылы – 93 адам (оның ішінде 51 орыс тілінде оқитындар, 42 қазақ тілінде оқитындар);
• Кәсіби бағдар жұмысы – 82 адам (61 орыс тілінде, 21 қазақ тілінде оқитындар);
• Ұрпақтар сабақтастығы – 40 адам (36 орыс тілінде, 4 қазақ тілінде оқитындар).
ЖАСҰО жүргізіп отырған кәсіби бағдар жұмысы жастардың мамандыққа қызығушылығын арттыруда маңызды рөл атқаратыны белгілі болды.
Болашақ жоспарлар: мамандық бойынша жұмыс істеу ниеті
Сауалнама нәтижесінде студенттердің 77-сі (28 қазақ тілінде, 49 орыс тілінде оқитындар) өз мамандығы бойынша жұмыс істегісі келетінін айтты. Қалғандары болашағы жайлы нақты шешім қабылдамаған.
Кәсіби бағдар жұмысының нәтижесі
ЖАСҰО-ның 5 жылдан астам уақыт бойы жүргізген кәсіби бағдар жұмысы оң нәтижелерін көрсетуде. Алдағы уақытта автожол саласындағы кадр тапшылығын жою үшін бұл бағытты күшейту және автожол ұйымдары мен ҚР Индустрия және инфрақұрылымдық даму министрлігімен бірлесіп әрекет ету ұсынылады.
ЖАСҰО қызметкерлері осы уақытқа дейін мектеп оқушыларымен 7 000-нан астам кәсіби бағдар кездесуін өткізді. Астана мен Алматы қалаларындағы РФММ және BINOM SCHOOL сияқты білім беру мекемелерімен арада меморандумға қол қойылған. Ал мекеменің Алматы қалалық филиалының мамандары жоғары оқу орындары студенттерімен де, мектеп оқушыларымен де кәсіптік бағдар кездесулерін тұрақты түрде өткізіп тұрады. Мысалы, Қазақ автомобиль жол институтының, Көлік және логистика университетінің және Қ.Сәтбаев атындағы университеттің студенттерімен бірнеше мәрте кездесу өткізді.