Алматы қаласындағы Жол активтері сапасының ұлттық орталығының ұжымы Алатау ауданында өткен Мамандықтар жәрмеңкесіне қатысып, мектеп түлектеріне жол саласындағы мамандықтардың маңыздылығы мен болашағы туралы ақпарат берді.
Іс-шара 201 мектеп-гимназиясында ұйымдастырылып, оған бірнеше кәсіпорын мен мекеме өкілдері шақырылды.
Филиал инженері Мейіржан Мырзахметтің айтуынша, мектеп түлектері үшін кәсіби бағдар беру – болашақ таңдауына ықпал ететін маңызды қадам.
“Биыл жол құрылысы мамандықтарына қосымша 700 грант бөлінді. Өкінішке қарай, былтыр бұл салаға бөлінген гранттар толық игерілмей қалды. Сол себепті біз қала мектептерін белсенді аралап, жол саласын насихаттап жүрміз. Қазір бұл салада білікті мамандар қатты қажет”, – дейді ол.
Жол активтері сапасының ұлттық орталығы мектеп түлектері мен студенттерге кәсіби бағдар беруді өз қызметінің маңызды бағыттарының бірі ретінде қарастырады. Мекеме өкілдері мұндай кездесулерді жыл бойы тұрақты түрде өткізуді жоспарлап отыр.