Мәжіліс депутаты, Respublica партиясының өкілі Айтуар Қошмамбетов Қазақстандағы жеңілдетілген салық режиміне қатысты жағдайды түсіндірді. Оның айтуынша, елдегі екі миллионға жуық кәсіпкер жеңілдетілген салық жүйесі бойынша жұмыс істейді, бірақ үкімет салық режимдерін біріктіріп, жаңа Салық кодексінде тек 40 қызмет түрін ғана қалдыруды жоспарлап отыр.
«Қазақстанда екі миллионға жуық кәсіпкер жеңілдетілген салық режимінде жұмыс істейді. Алайда үкімет салық режимдерін біріктіріп, тек 40 рұқсат етілген қызмет түрін ғана қалдыруды ұйғарды. Бұл жаңа Салық кодексінде бекітіледі», – деді Қошмамбетов Мәжілісте.
Ол қалған кәсіпкерлер қиын жағдайда қалатынын атап өтті: оларға жалпыға ортақ салық режиміне өтуге немесе бизнесті мүлде жабуға тура келеді.
«Қалған 1,7 миллион кәсіпкер қосымша шығындарға ұшырайды. Жылдық айналымы 15 миллион теңгеден аспайтын компаниялардың өзі бухгалтер жалдауға мәжбүр болады. Бұл – шағын бизнеске үлкен жүк», – деді депутат.
Қошмамбетов мұндай шаралардың әділдігіне күмән келтіріп, бұл кәсіпкерлік секторға кері әсерін тигізетінін айтты.
«Бұл әділетті ме? Білмеймін. Бірақ бұл кәсіпкерлер үшін үлкен қиындық туғызатыны анық. Бұл мәселені күн тәртібіне қою керек. Respublica партиясымен бірге біз бұл өзгерістерді талқылап, әділетті шешімдерге қол жеткізуіміз қажет», – деп қосты ол.
Еске сала кетейік, бұған дейін әлеуметтік желілерде Қазақстан үкіметі Салық кодексіне өзгерістер енгізуді жоспарлап жатқаны туралы ақпарат тараған болатын. Бұл өзгерістер жеңілдетілген салық режиміндегі рұқсат етілген қызмет түрлерінің санын едәуір қысқартуды көздейді. Бұл жаңалық кәсіпкерлер арасында алаңдаушылық туғызды, өйткені олар күрделі салық режиміне өтіп, бухгалтерлік есепке қосымша шығын шығаруға мәжбүр болады.
Respublica партиясының өкілдері бұл жаңа шаралар шағын және орта бизнеске үлкен соққы болатынын айтып, кәсіпкерлерді қолдауға және жаңа салық ережелеріне қатысты өз пікірін білдіруге шақырды.