Алматыдағы Қазақ жол ғылыми-зерттеу институтында шағыл тасты-мастикалық асфальтбетон (ЩМА) жамылғысын тиімді пайдалану және оның оңтайлы құрамын жобалау мәселелеріне арналған семинар өтті. Бұл жиынға жол саласына қатысы бар мекемелердің өкілдері шақырылды.
Семинардың арнайы қонағы – “Шағыл тасты-мастикалық асфальтбетоннан жасалған жамылғылар” кітабының авторы, танымал жол маманы Е. Смирнов болды. Сондай-ақ, шараға Жол активтері сапасының ұлттық орталығы (ЖАСҰО) Алматы филиалының мамандары қатысты.
ЖАСҰО Алматы филиалының бөлім басшысы Айдар Бейіспеков мұндай жиындардың маңыздылығын атап өтті:
“Қазіргі уақытта ЩМА барлық өңірлерде кеңінен қолданылуда. Сонымен қатар, нормативтік құжаттарға заман талабына сай өзгерістер енгізу мәселесі талқылануда. Бұл семинар жол мамандарына, асфальт-бетон зауыттарының (АБЗ) мамандарына және мердігерлерге пайдалы ақпарат беруге бағытталды. Смирнов мырза ЩМА қоспасын қалай дайындау керектігі, оны төсеу технологиясы және қандай қоспалар қосу қажеттігі туралы баяндама жасады. Кездесу өте пайдалы өтті деп ойлаймын, себебі қатысушылар маңызды әрі құнды ақпарат алды”, – деді Айдар Серікұлы.
Семинар жол құрылысы саласындағы заманауи тәсілдермен және технологиялармен танысуға, сондай-ақ сала мамандарының өзара тәжірибе алмасуына мүмкіндік беретін маңызды алаң болды. Қатысушылар бұл басқосудың жоғары деңгейде өткенін және жол құрылысының сапасын жақсартуға оң ықпал ететінін атап өтті.