2024 жылғы 15 қарашада ҚР Көлік министрі Марат Қарабаев Алматыда тұрғындармен кездесу өткізді. Іс-шара барысында министр қаланың көлік инфрақұрылымы мен жолдардың сапасын, мегаполистің транзиттік мүмкіндіктерін жақсартуға қатысты бастамаларды талқылады, деп хабарлайды QAZNEWS.KZ
Кездесуде Алматының көлік желісін жүктемеден босату үшін қабылданған шаралар атап өтілді. Соның ішінде, 2023 жылы ашылған БАКАД (Үлкен Алматы айналма автомобиль жолы) жобасының нәтижелері айтылды. Бұл жол қаланың экологиясын жақсартып, көлік кептелісін азайтуға айтарлықтай әсер етті. Қазіргі уақытта транзиттік тасымалдардың шамамен 40%-ы Алматы орталығын айналып өтеді, бұл көлік қозғалысын жеңілдеткені белгілі болды.
Министр, сонымен қатар, тұрғындардың сұрақтарына жауап беріп, қоғамдық көлік жүйесін жаңғырту, жолдарды жөндеу және әуежай қызметтерін дамыту бойынша жоспарларды таныстырды. Халықтың ұсыныстары мен сын-пікірлері алдағы жұмыс жоспарларын құруда ескерілетінін айтты. Тұрғындардың бірі қала жолдарының сапасына қатысты сауал қойды. Министр Марат Қарабаев автомобиль жолдарының сапасы қатаң бақылауда екенін атап өтті.
“Жолдардың жай-күйі және сапасы екі түрлі ұғым. Халық соны дұрыс түсіну қажет. Бізде жаңа салынып жатқан жолдар мен орташа жөндеудегі жолдардың сапасын тексеріп, сараптама жасайтын мекеме — Жол активтерінің ұлттық сапа орталығы. Әр өңірде мекеменің филиалы бар. Қажетті сынамалар мен сараптамаларды тыңғылықты жүзеге асырып, қорытындысын береді. Ал аталған мекеменің қорытындысы болмаса құрылыс болған немесе жөндеу жасалған жол қабылданбайды”, — деді Көлік министрі.
Кездесулер осындай форматта еліміздің басқа өңірлерінде де жалғасуда. Бұл халықпен ашық диалог құруды және көлік саласындағы түйткілдерді шешуге бағытталған үкіметтің бастамасы.