Жуырда «Мейірім 16» орталығының ашылғанына бір жыл толады. Бұл орталық – Қазақстандағы 18 жастан асқан менталдық және физикалық мүмкіндігі шектеулі жасөспірімдер мен жастарды әлеуметтік бейімдеуге, интеграциялауға және кәсіби бағдарлауға арналған алғашқы арнайы алаң. Айта кету керек, қысқа уақыт ішінде орталық жастарға мамандық таңдауда, өмірлік мақсаттарын қалыптастыруда және болашақта дербес әрі табысты өмір сүруге қажетті дағдыларды дамытуда маңызды орынға айналды, деп жазады QazNews.kz
«Мейірім 16» орталығы жұмысының басты бағыттарының бірі – кешенді кәсіби бағдар беру. Орталық мамандары күн сайын жастардың таным көкжиегін кеңейтетін, оларды түрлі сала мамандықтарымен таныстыратын және оқу мен жұмыстың қолайлы бағыттарын таңдауға көмектесетін бағдарламаларды жүзеге асырады.
Осы жұмыс аясында Алматының Жоғары стоматология колледжіне таныстыру экскурсиясы ұйымдастырылды. Онда жасөспірімдер оқу үдерісімен танысып, оқу кабинеттерін көріп, медицина және стоматология саласындағы мамандықтар туралы ақпарат алды.
Сонымен қатар орталық қаладағы жетекші оқу орындарымен — Алматы технологиялық колледжімен, Архитектура, дизайн және инженерия колледжімен ұзақ мерзімді әріптестік орнатып келеді. Осы ынтымақтастық аясында педагогтар тарапынан практикалық мастер-кластар өткізіледі. Мұндай жобалар жастарға тек мамандықтар туралы ақпарат алып қана қоймай, тәжірибелі мамандардың жетекшілігімен өздерін нақты бағыттарда сынап көруге мүмкіндік береді.
Білім беру ұйымдарымен жұмыс жасаудан бөлек, «Мейірім 16» орталығы жастар болашақта жұмыс таба алатын мекемелермен байланыс орнатуда.
Орталықта болған уақыт ішінде олар Алматы экохабына, «Шаңырақ» қарттар үйіне, «Доброта» қарттар орталығына, НТК телеарнасына және танымал қазақстандық әншінің студиясына барды.
Мұндай сапарлар жасөспірімдерге нақты жұмыс процестерін көріп, мамандармен танысып, ұжым атмосферасын сезініп, өздеріне ұнайтын бағытты бағамдауға мүмкіндік береді.
Орталық қызметкерлерінің айтуынша, осындай жұмыстардың арқасында ерекше қажеттіліктері бар жастар өз әлеуетін ашып, өзіне деген сенімділігін арттырып, жаңа білім мен тәжірибе жинақтайды. Бұл олардың кәсіби және әлеуметтік өмірге жол ашуына мүмкіндік береді.