Қазақстан құқық қорғау органдары Грузиядан Kyzdar.net сайты арқылы жезөкшелік қызметін ұйымдастыруға қатысы бар деп күдікке ілінген әйелді экстрадициялады. Өзбекстан азаматы трансұлттық ұйымдасқан қылмыстық топтың құрамында болған деп күдікке ілінген, деп жазады QazNews.kz.
Тергеу мәліметінше, күдікті ұйымдасқан топтың басқа мүшелерімен бірге Kyzdar.net интернет-ресурсына сауалнамаларын орналастырған жезөкшелікпен айналысатын адамдардан өтінім қабылдаған.
Олар сайттағы анкеталарды толықтыру және ақылы түрде ілгерілету арқылы жыныстық сипаттағы қызметтерді жарнамалауға көмектескен. Түскен ақшаның бір бөлігін топ мүшелері комиссия ретінде ұстап қалып, қалғанын сайт әкімшілеріне аударып отырған.
Осылайша, күдіктілер заңсыз делдалдық схеманың тұрақты жұмыс істеуін қамтамасыз еткен деген болжам бар.
Қылмыстық топтың бірқатар мүшесі бұған дейін сотталып, әртүрлі мерзімге бас бостандығынан айырылған. Ал топтың кейбір қатысушылары, соның ішінде осы әйел де қылмыстық қудалаудан жасырынып, халықаралық іздеуге жарияланған.
Биыл шілдеде күдікті Грузия аумағында ұсталған. Қазақстан Бас прокуратурасының сұрауы бойынша ол елге экстрадицияланды. Қазір әйел тергеу изоляторына қамалған.
Оған тағылған айыптар дәлелденсе, мүлкі тәркіленіп, 10 жылға дейін бас бостандығынан айырылуы мүмкін.
