Алматыда Рысқұлов даңғылынан Бұқтырма көшесіне дейінгі учаскеде Құлжа трактінің жүріс бөлігін рекострукциялау аяқталды. Жол 2,3 км учаскеде 4-тен 6 жолаққа дейін кеңейтілді, бұл оның өткізу қабілетін екі есеге арттырды.
Қалалық мобилділік басқармасы реконструкцияланған учаскенің барлық ұзындығында жолдың негізін салу, асфальтбетон жабынының төменгі және жоғарғы қабаттарын төсеу бойынша жұмыстар жүргізілгенін хабарлады. Сондай-ақ, жаңа жарықтандыру тіректері орнатылып, уақытша жол белгілері қойылды.
Бұл ретте жолдың шеттерінде тосқауыл қоршауын және жолдың екі жағынан ені 2-ден 3 метрге дейінгі тротуарларды орнату жұмыстары жалғасуда. Жобаны ағымдағы жылдың соңына дейін аяқтау жоспарлануда.
Маңызды автожолды жөндеу барысында Жол активтерінің ұлттық сапа орталығының мамандары белсенді жұмыс атқарды. Мекеме инженерлері құрылыс материалдарының сапасын, жол төсеу технологиясын қадағалап, жаңа асфальт қабатынан сынамалар алды. Алынған сынамалар зертханада түрлі сынақтан өтіп, тексерілді. Жол активтерінің ұлттық сапа орталығы Алматы филиалының директоры Мәулен Әліповтің айтуынша, сапаны тексеру жұмыстары тыңғылықты жүргізілген.
“Біздің мекеменің қызметкерлері Құлжа трактіндегі жөндеу жұмыстарының барлық кезеңдеріне қатысты. Аталған нысанға 10 мәрте тексеруге шықты. Жолдан 48 сынама алынды. Соның 46 сынамасы талаптарға сай болды. Ал 2 сынама материал зертханада. Нәтижелерді тапсырыс беруші мен мердігер мекемеге жібереміз” — деді Мәулен Тоқтарбайұлы.
Естеріңізге сала кетейік, Жөндеу жұмыстарын “Алматыдорстрой” ЖШС жүзеге асырды. Мегаполис әкімі Ерболат Досаевтың тапсырмасы бойынша жұмыстар ең аз қозғалыс шектеулерімен жүргізілді. Әр кезеңде екі бағыт бойынша екі жолақты қозғалыс қамтамасыз етілді.