Қазақстан Ұлттық банкі банкаралық мобильді аударымдардың бір операциясына арналған базалық лимитті 500 мың теңгеден 1 млн теңгеге дейін ұлғайтуды ұсынып отыр. Бұл туралы Ұлттық банк төрағасының орынбасары Бинур Жаленов мәлімдеді, деп хабарлайды qaznews.kz.
Жаңа талаптар қабылданса, олар қазан айының соңында күшіне енуі мүмкін.
Әңгіме 19 шілдеде іске қосылған Банкаралық мобильді төлемдер жүйесі (БМТЖ) туралы болып отыр. Бұл жүйе азаматтарға түрлі банктер арасындағы қаражатты телефон нөмірі немесе QR-код арқылы аударуға мүмкіндік береді. Көпшілікке ол «Бірыңғай QR» жүйесі ретінде танымал.
1 млн теңге барлығына бірдей лимит болмайды
Ұлттық банк өкілдерінің айтуынша, 1 млн теңге барлық клиенттер үшін міндетті шекке айналмайды. Әр банк өз тәуекелдерді басқару саясатына сәйкес лимиттерді реттей алады.
Мысалы, банк жүйесі күмәнді белсенділікті анықтаса, ірі көлемдегі аударымды уақытша тоқтатуы немесе бұғаттауы мүмкін. Бұл алаяқтық әрекеттердің алдын алу үшін қажет. Сонымен қатар клиенттер бұрынғыдай мобильді қосымша арқылы өздерінің жеке лимиттерін орната алады.
Лимит неге ұлғайтылмақ?
Ұлттық банк әзірге бұл шешімнің нақты себептерін түсіндірген жоқ. Дегенмен сарапшылардың пікірінше, лимитті көтеру цифрлық төлемдердің кең таралуымен байланысты болуы мүмкін.
Соңғы жылдары қазақстандықтар тұрғын үй жалдау, автокөлік сатып алу, жөндеу жұмыстары, бизнес есеп айырысулары секілді ірі төлемдерді де мобильді аударым арқылы жүргізе бастады. Қазіргі 500 мың теңгелік шек кейбір операциялар үшін жеткіліксіз болуы мүмкін.
Сондай-ақ Бірыңғай QR жүйесінің танымалдылығын арттыру және қолма-қол ақшасыз төлемдердің үлесін көбейту мақсатында да лимитті ұлғайту қарастырылып отырғаны жоққа шығарылмайды.
Мамандардың айтуынша, лимиттің көтерілуі азаматтарға ыңғайлы болғанымен, қауіпсіздік талаптары мен алаяқтыққа қарсы бақылау тетіктері бұрынғыдай сақталады.
