Әлеуметтік желіде «бюджет қаражаты онсыз да тапшы кезде Петропавл әкімдігі қыруар қаржыға қымбат үйлер сатып алғаны» туралы ақпарат пайда болды, деп жазады QazNews.kz
Петропавл қалалық әкімдігі жалпы құны 340 миллион теңге болатын екі жер үй сатып алғаны белгілі болды. Мәлімет бойынша бұл үйлер кейін сүріліп, олардың орнына балабақша салу жоспарланған.
Мемлекеттік сатып алу порталында жарияланған ақпаратқа қарағанда, екі үй де бір адамның меншігінде болған. Әрқайсы үшін әкімдік 170 миллион теңге төлеген.
Әлеуметтік желіде сатып алынған үйлердің видеосы жарияланды. Роликте үйдің бұрынғы иесі ғимарат ішіндегі мүліктерді, есік-терезелерді алып кетіп жатқаны айтылады. Бұл жайт та желі қолданушыларының ашуына тиген.
Бұған дейін үйлерге қойылған талаптар жарияланған еді. Онда бір үйдің аумағы 217 шаршы метр, екіншісінің ауданы 226 шаршы метр болуы керек екені көрсетілген. Сонда бір шаршы метрдің құны 750-800 мың теңге аралығында бағаланған.
Желідегі жұрттың пікірлерінің басым бөлігі сынға толы:
-
«Бұл үйлердің мұндай ақша тұрмайтыны анық»
-
«Бюджетте ақша жоқ дейді, ал оны қалай жұмсап жатқаны көрініп тұр»
-
«Мұны міндетті түрде тексеру керек»
-
«340 миллионға 5-6 дәл осындай үй салуға болады ғой»
Қоғам бұл сатып алудың ашықтығына күмән келтіріп, түсіндіруді талап етіп отыр. Ал әкімдік әзірге жағдайға қатысты толыққанды ресми түсініктеме берген жоқ.