Непал мен Тибеттегі табиғи апаттан кейін хабар-ошарсыз кеткен үш қазақстандық әйелдің бірі Қазақстаннан табылды. Белгілі болғандай, ол апат болған аймаққа бару жоспарынан бас тартып, елге оралған. Ал қалған екі қазақстандықтың қайда екені әзірге белгісіз, деп хабарлайды qaznews.kz.
Қазақстандық әйел қайда болған?
Қазақстан Сыртқы істер министрлігінің ресми өкілі Жанболат Үсенов бұған дейін жоғалғандар қатарында болған әйелдің апат аймағына барудан бас тартқанын мәлімдеді. Қазір ол Қазақстанда жүр.
Бұған дейін үш қазақстандық турист хабар-ошарсыз кеткендер қатарында тіркелген еді. Олардың екеуі Непалда, ал үшіншісі Қытайдың Тибет автономиялық ауданында болған.
Қалған екі қазақстандық туралы не белгілі?
Қазақстандық екі әйелдің қазіргі орналасқан жері әлі анықталған жоқ. Қажет болған жағдайда табылған мәйіттердің кім екенін анықтау үшін олардың туыстары ДНҚ сараптамасына қажетті биологиялық үлгілер тапсырған.
Қазақстандық дипломаттар жоғалған азаматтардың отбасыларымен байланыста болып, оларға көмек көрсетіп жатыр.
Су тасқынынан қанша адам қаза тапты?
Reuters агенттігінің мәліметінше, жойқын су тасқыны салдарынан кемінде 1 455 адам қаза тапқан. Тағы 5 285 адам хабар-ошарсыз кеткендер қатарында. Құтқарушылар 13 795 адамды қауіпсіз жерге көшірген.
Табиғи апат салдарынан 12 гидроэнергетикалық нысан қираған. Сонымен қатар жолдар мен көпірлер бүлініп, ауыл шаруашылығы алқаптары мен елді мекендерге айтарлықтай зиян келген.
Билік өкілдері апат салдарын жоюға, инфрақұрылымды қалпына келтіруге және баспанасыз қалған мыңдаған адамға көмек көрсетуге шамамен 5 млрд доллар қажет екенін бағалап отыр.
Іздестіру-құтқару жұмыстары аяқталды
5 қазанда Непал билігі іздестіру-құтқару операциясының ресми түрде аяқталғанын жариялап, қалпына келтіру жұмыстарына кірісті.
Ұлттық төтенше жағдайлар орталығының басшысы Фаниндра Пауделдің айтуынша, билік хабар-ошарсыз кеткен адамдарды заң жүзінде қайтыс болды деп тануға мүмкіндік беретін рәсімдерді қарастырып жатыр. Бұл олардың туыстарына сақтандыру төлемдерін рәсімдеуге және басқа да құқықтық әрі банктік мәселелерді шешуге мүмкіндік береді.
Сонымен бірге қалпына келтіру жұмыстары кезінде табылған адам сүйектері, жеке заттар мен құнды бұйымдарды іздеу жалғасады. Қажет болған жағдайда шұғыл құтқару жұмыстары да жүргізіледі.
