Шымкентте Ұлықбек Сманов есімді емшінің қорлығынан құтылған бүлдіршіндердің қазіргі жағдайы белгілі болды, деп хабарлайды QazNews.kz сайты Azattyq Rýhy сілтеме жасап.
Бөбектер үйіне келгенге дейін балалар Шымкент қаласының денсаулық сақтау басқармасының №9 қалалық емханасына тіркелген.
«Қазір балалар аз да болса, салмақ қосып, денелері тазарған. Бөбектер үйіне түскен уақытта дер кезінде медициналық тексеруден өтіп, ем-шаралар тағайындалды. Бүгінде түрлі витаминдер ішіп, емдік жаттығулар жасап, массаж алып жатыр. Психолог мамандар қарап жатыр. Бүлдіршіндер «Монтессори» сабағына күнделікті қатысып келеді. Балалардың жағдайы денсаулығы келген күннен әлдеқайда жақсы, дені сау», — деп жауап берді Шымкенттің денсаулық басқармасынан.
Еске салайық, Ұлықбек Сманов қамқорлығына алған балалардың ең үлкені 16 жаста болса, кішісі 3 жаста. Өгей әкесі оларға мысықтың еті мен зәрін берген. Жауыздықтан жапа шеккен ересек екі бала бейімделу орталығына, тағы төртеуі балалар үйіне бағытталған. Ер адамның өзі «сандырақ синдромы» диагнозымен Талғардың психикалық ауруханасында жатыр. Ер адамның үстінен қылмыстық іс қозғалған, қазір іс сотқа жолданды.