Нұрсұлтан Назарбаевтың Әсел Исабаевадан туған үлкен ұлы, 21 жастағы Тауман үйленгелі жатыр. Ulysmedia.kz басылымының дереккөздері той елордадағы ең қымбат қонақүйлердің бірінде өтетінін хабарлаған. Қонақтар қатарында танымал кәсіпкерлер, саясаткерлер және «Ескі Қазақстанның» өкілдері болады деп күтілуде, деп хабарлайды Qaznews.kz.
Ulysmedia.kz дереккөздерінің мәліметінше, Тауман Назарбаевтың үйлену тойы Астанадағы The Ritz-Carlton қонақүйінде өтеді. Қалыңдық – Қазақстанның бұрынғы қорғаныс вице-министрінің қызы.
– Салтанатты шараға дайындық күшейтілген қауіпсіздік шараларымен жүргізіліп жатыр. Қонақүй маңындағы аумақты қоршау жұмыстары той қарсаңында-ақ басталған, – дейді редакцияға сұхбат берген адам.
Қонақтар тізімі де күйеу жігіттің тегіне сай болмақ. Тойға саясаткерлер, ірі кәсіпкерлер және Нұрсұлтан Назарбаев президент болған кезеңде ықпалы зор болған элита өкілдері шақырылған.
Тауман 2005 жылы дүниеге келген. Оның анасы Әсел Исабаева, сондай-ақ Әсел Құрманбаева есімімен де танымал. Ол 1999 жылы «Мисс Қазақстан» атанған.
Қазір Тауман 21 жаста. Ұзақ уақыт бойы тұңғыш президенттің екінші отбасы туралы ашық айтылмады, тек бұқаралық ақпарат құралдарында тараған қауесеттер ғана болған. Нұрсұлтан Назарбаев бұл туралы алғаш рет 2023 жылы жарық көрген мемуарында жазды. Онда ол Әселмен мұсылмандық дәстүр бойынша некелескенін айтқан. Бұл отбасында екі ұл дүниеге келген: Тауман – 2005 жылы, Байкен – 2008 жылы туған.
