Шымкент қаласын сумен қамтып отырған табысты кәсіпорын — “Су ресурстары-Маркетинг” ЖШС. 25 жылдық тарихы бар маңызды компания басшылары мекемеге қауіп төніп тұрғанын мәлімдеді, деп хабарлайды QazNews.kz ақпарат.
Ірі кәсіпорын 1000-нан астам адамды жұмыспен қамтып отыр. Табысты мекеменің басшылығы “Су ресурстары-Маркетинг” ЖШС-ін Шымкент әкімдігі тартып алмақшы деген ақпарат таратуда. Оның айтуынша, соңғы 1 жылда қала әкімі “стратегиялық нысан” деген желеумен кәсіпорынға қысым көрсетіп келеді. Тіпті, мекемеге заңсыз тексерулер жиілеген. Президент қолынан “Алтын сапа” сыйлығын алған кәсіпкер Анарбек Орман Шымкент қаласының әкімдігі қудалауды тоқтатар емес дейді.
“Бұл жерде әкімнің мүддесі ғана бар. Осы әкімге дейін мұндай проблема болған емес. 26 жыл болды істеп жатқанымызға. Осы әкім келді де, “мемлекетке қайтарам” деді. Содан бері бір жылға жақындады. Қандай заңға сүйеніп қайтарасыз деп сұрадым. Ол “стратегиялық нысан” дейді. Мен “стратегиялық нысан” ретінде мекеме 1998 жылы құрылғанын айттым”, — дейді “Су ресурстары-Маркетинг” ЖШС құрылтайшысы Анарбек Орман.
Шымкент әкімдігі компанияны үш рет сотқа беріп, үш рет те де арызын қайтарып алған. Бір миллионнан астам адамды сапалы ауыз сумен қамтып отырған мекеме жайында Үкіметтегі жауаптылар оң пікірде.
Есеп-қисабы дұрыс, табысты еңбек етіп келе жатқан кәсіпорын түрлі инвестициялық жобалар арқылы Польшаның, Ұлыбританияның озық технологияларын қолданысқа енгізіп, тозығы жеткен желілер мен құрылғыларды ауыстырып үлгерген. Мысалы, қаладағы 1900 шақырым су құбырының 110 шақырымын жаңалаған. Ал 2023 жылға дейін мекеме мемлекетке 16 млрд теңге салық төлеген. Биыл 2,2 млрд теңге бюджетке салық ретінде құймақшы. Ал қала әкімі Ғабит Сыздықбеков өткен айда мәслихат сессиясында кәсіпорынды мемлекет меншігіне алдағы уақытта қайтаратынын мәлімдеген.
“Ашығын айтқанда, кәсіпорын бөлінген қаржыны мақсатсыз пайдаланып келді. Тексеру жұмыстары басталған бетте құбырларды ауыстырып, іске кірісіп кетті. Қазір тиісті органдар тексеру жұмыстарын жүргізіп жатыр. Нәтижесі дайын болғанда халыққа жариялаймыз. Кәсіпорын мемлекетке қайтарылады. Оны Орман мырза да түсінеді деп ойлаймын”, — деді Ғабит Сыздықбеков.
Алайда кәсіпорын басшылығы тағылған айыптармен мүлде келіспейді. Оның айтуынша, қала әкімдігі “Су ресурстары-Маркетинг” серіктестігіне құбыр жаңарту, қайта құруға 26 жыл бойы ешқандай қаржы бөлмеген. Мемлекет берген субсидияларға қатысты тиісті орындар тексеру жүргізіп жатыр.
Анарбек Орман мырза ұсынған құжаттарға сәйкес кәсіпорын бірнеше көрсеткішпен тиімді еңбек етіп жатқаны байқалады.
- Шымкентте су қолданушы барлық абонентте қашықтан басқарылатын есептегіш құралдар орнатылған. Олардың жалпы саны — 258481.
- 463 шақырым кәріз құбырының 100 шақырымы қайта жаңарған
- Қайта құру жұмыстарынан кейін желіде су үнемдеу 58%-дан 5%-ға төмендеген.
- 1 адамға тәуліктік су тұтыну 456 литрден 125 литрге азайған. Нәтижесінде 25 жылда 71,2 млрд теңге қаржы үнемделген.
- Шымкент қаласында тұрғындарды сумен қамту 100%.
- Құрылғылар мен жабдықтарды жаңарту нәтидесінде электр қуатын үнемдеу 97640 мың квт.тан 11648 мың квт.қа төмендеген.
- Мекемеде үлесі бар әкімдікке 2023 жылы 229 млн теңге дивиденд төленген.
- Кәріз суларын тазарту орталығы қоршаған ортаға зиянсыз, тиімді жұмыс істеуде. “Астана су” мекемесі Шымкент тәжірибесін қолдануға ниетті.
Анарбек Орман мырза оң нәтижелер мен жетістіктер бұдан да көп дейді. Елдегі озық үлгіде тиімді жұмыс істеп тұрған кәсіпорын ары қарай да Шымкент халқының игілігі үшін қызметін тоқтатпаса екен деп тілейді құрылтайшылар.