Жамбыл облысында өгей әке кәмелетке толмаған үш баланы қинағаны үшін сотталды, деп жазады QazNews.kz
Талас аудандық соты кәмелетке толмаған 3 баланы қинады деп айыпталған сотталушы Т.-ға қатысты қылмыстық істі қарады.
Сотта 2019 жылдан 2025 жылға дейін сотталушы Т. шаруа қожалығы аумағында кәмелетке толмаған өгей балаларына күш қолданып, оларды азаптағаны анықталған.
«Сотталушы балаларды қоғамнан оқшаулап, олардың оқуы мен дамуына кедергі келтірген, еңбекке мәжбүрлеп, тамақтануын шектеген. Сотталушы олардың еңбегінен түскен кірісті өзінің жеке мүддесіне пайдаланған», — деп жазылған хабарламада.
Сот үкімімен Т. ҚК-нің 110-бабы 2-бөлігінің 1, 2) тармақтары бойынша кінәлі деп танылып, оған 4 жыл мерзімге бас бостандығынан айыру түріндегі жаза тағайындалды.
Үкім заңды күшіне енген жоқ.
Еске сала кетейік, екі жасөспірім биылғы тамыз айының басында Талас ауданындағы шаруа қожалықтарының бірінен құтқарылған болатын. Олар 5 жылдан астам уақыт бойы еркінен тыс мал бағуға жегілген. Балалардың ұялы телефондары тартып алынып, жоғалған әрбір қой үшін таяқ астына алынған. Полиция қызметкерлері әлеуметтік желіде тараған қажыған балалардың видеосынан кейін оларды қауіпті ортадан жедел алып шыққан еді.