Алматы облысының Райымбек ауданы – экономикасы ауыл шаруашылығына негізделген аудан. Өңір «Нарынқол картобымен» танымал. Оған қоса, мал шаруашылығы, оның ішінде ет-сүт және тері-жүн өнімдері жолға қойылған. Дегенмен, шешімін таппаған мәселелер де бар, деп хабарлайды QazNews порталы Informburo.kz-ке сілтеме жасап.
Аудан әкімі Берік Дүйсенбаев арнайы баспасөз туры барысында ауданда мал саны мен өсімі жақсы екенін атап өтті.
«47 мыңдай жылқы, 80 мыңнан астам ірі қара, 30-40 түйеміз бар. Мал саны көп, бірақ сапа жағынан істейтін жұмыс көп. Осы орайда, аудан шаруалары асыл тұқымды мал шаруашылығына бет бұрып жатыр. Қойға келсек, бүгінде шаруалар меринос қойдан бас тартып, өзіміздің қазақы қой өсірумен айналысып жатыр. Бәрі демесек те, басым бөлігі. Асыл тұқымды мал ет-сүт бағытындағы ауыл шаруашылығын дамытуға серпін береді», – деген аудан әкімі Кеген мен Райымбек аудандарына ортақ ет комбинаты күніне 25 тонна ет қабылдай алатынын тиек етті.
Әкім сөзінше, комбинат толық қуатпен жұмыс істеуі үшін жыл он екі тұрақты мал келіп отыруы керек. Бірақ, шаруалар күзде жайлауда семірген малын сатуға үйреніп қалған, ал жыл бойы мал бордақылауда мәселе көп.
Сондай-ақ, ауданда үш жыл бұрын іске қосылған Qarasaz Food сүт зауытында да осыған ұқсас мәселе бар. Зауыт тәулігіне 40 мың литр сүт өңдей алады, дегенмен қазір 15 мың литр өніммен (2 жыл бұрын 2 мың болған) шектеліп отыр. Зауыт күш алуы үшін шикізат сүт үзілмей келіп отыруы тиіс. Әзірге мәселе ауылдарда зауыт үшін сүт сатып алатын орындарды ашумен шешіліп отыр.
Нарынқолдың символына айналған картоптың да шығымы өткен жылы төмен болған. Оның себептерін «Алтын дән-1» ауыл шаруашылығы өндірістік кооперативінің жетекшісі Дулат Құлмамыров атады.
«Райымбек ауданында егістік алқабын, оның ішінде картоп шаруашылығын дамыту үшін су мәселесін шешу керек. Сол үшін тамшылатып суару әдісін енгіздік, 250 метр тереңдіктен су шығаратын қондырғыны іске қосып жатырмыз. Сол суды 30 мың текше метрлік қоймаға жинап, егістіктерге тамшылатып суару жүйесімен үнемді түрде жібереміз», – деді ол.
Кооператив жетекшісі, сондай-ақ, өткен жылы картоп түскен ауру да оның шығымына кері әсерін тигізгенін айта келе, соңғы жылда Нидерландтар елінен әкелінген «Аризона», «Артемис», «Агрия» сынды картоп сорттары егіліп жатқанына тоқталды. Бұл сорттар аудан географиялық жағдайына тез бейімделгіш. Биылдың өзінде 200 тонна картоп тұқымы егу үшін әкелінген.
Фото: Самат Құсайынұлы
Айта кетейік, қазір ауданда жыл сайын шамамен 50 мың тонна картоп алынады. Оның 10 мыңы тұқым ретінде сақталып, 40 мыңы Алматы облысы мен Алматы қаласына сатылады. Аудан басшылығы жаңа технологиялар көмегімен су мәселесі шешілсе, картоп шығымын екі есеге дейін арттыруды көздеп отыр.