Алматы қаласында ағымдағы жөндеу мен орташа жөндеу жұмыстары биыл да белсенді түрде басталды, деп хабарлайды Qaznews.kz
Мегаполистің барлық аудандарында ағымдағы немесе «шұңқырлы» жөндеу жалғасып отыр. Жұмыс барысында шұңқырлар, жарықтар, ойылып кеткен жерлер жойылады, бақылау құдықтарының қақпақтары түзетіліп, жиектастары тегістеледі.
Аудандық әкімдіктер ағымдағы жөндеу жұмыстарына осы жылдан бастап өкілеттіктерді орталықсыздандыру аясында тапсырыс беруші болып табылады. Жұмыс «Жол активтері сапасының ұлттық орталығы» ШЖҚ РМК бақылауымен жүргізіледі. Сынақ және сараптама нәтижесі бойынша анықталған ақаулар мен ескертулерді мердігер ұйымдар жояды. Мекеме инженері Досжан Сұрапбергеновтің айтуынша, биыл бақылау мен тексеріс жылдағыдай қатаң бақылаумен жүргізілмек.
“Біздің орталық қалалық мобильдік басқармасымен бекітілген келісімшарт негізінде жұмыс істейді. Мердігер мекемелердің жұмысынан кемшілік, ақау анықталса, бірден құжатталып, олқылықты жоюды тапсырамыз. Жұмыс барысында барынша цифрландыру, жаңа технологияларды қолданамыз. Мысалы, жаңа төселген жол жабынынан керн сынамасы алынғанда оған арнайы QR код беріледі. Сол код арқылы зертханаға барады. Сонымен қатар, әр инженерде жеке планшет бар. Оған тек Face ID арқылы кіру мүмкін. Осылайша, барынша ашық әрі шынайы жұмыс істейміз” — дейді орталық қызметкері.
Алматы қаласы жолдарының жалпы ұзындығы 3097 км. Биыл жол жабынына орташа жөндеу ұзындығы 250 км болатын 274 көшеде жүргізіледі. Көшелердің толық тізімі мен орташа жөндеу жұмысының жоспары Almaty.kz сайтында жарияланған.