Алматыда жолшылар мен жол салу мен жөндеуге тапсырыс беруші әкімдік өкілдері жол құрылысындағы нормативтерге енгізілген өзгерістермен танысты, деп хабарлайды QazNews.
Биыл жол құрылысындағы нормативтерге бірқатар өзгерістер енгізілді. Жаңашылдықты өңірдегі жолшыларға жеткізу мақсатында «Жол активтері сапасының ұлттық орталығы» РМК Алматы қалалық филиалы ALT university ғимаратында оқыту семинарын өтті. Біліктіліктті арттыруға арналған іс-шараға Алматы қалалық мобильдік басқармасы, аудандық әкімдіктер мен қызметкерлер қатысты.
Жиында мекеменің орталық аппарат мамандары автомобиль жолдарын пайдалану кезінде ведомстволық сараптама, диагностикалау, паспорттау және жол сапасын бақылау мәселелеріне кеңінен тоқталды. Кемшіліктерді дер кезінде анықтау және ақауларды уақытылы жою туралы да мағлұмат берді. Сонымен қатар, орталық жобасы саналатын «КazRoadLab» автоматтандыру жүйесінің жұмысы таныстырылды. Жол құрылысындағы нормативтерге биыл енгізілген бірқатар өзгерістер мұқият түсіндірілді.
«Соңғы бекітілген нормативте жол салушы мердігердің міндеттері, техникалық қадағалаушының қызметі, тапсырыс берушінің құзыретіне қатысты бірқатар өзгеріс бар. Яғни, әр тарапқа жауапкершілік жүгі арта түскен. Әсіресе, жаңадан салынған жолды қабылдап алу кезінде тапсырыс берушілер де норматив талаптарын ескеруі тиіс» дейді «Жол активтері сапасының ұлттық орталығы» РМК Алматы қалалық филиалының директоры Мәулен Тоқтарбайұлы.
Мегаполис жолдарының сапалы салынуы осы саладағы әр мекемеге ортақ міндет. Сондықтан, жол құрылысындағы нормативтік талаптарды жергілікті стқарушы органдағы салаға жауапты әрбір маман білуі тиіс. Семинарға қатысқан жол саласына жауапты орган өкілдері көкейде жүрген біраз сауалдарына жауап тауып, мұндай оқыту семинарларының пайдалы екенін атап өтті.