Алматыда көше-жол желісін орташа жөндеу жұмыстары жалғасуда. 95 көшеде жөндеу аяқталса, тағы 100-ден астамында жұмыс қызған. Ал жаңа жол жабындысының сапасын Жол активтері сапасының ұлттық орталығы қадағалауда, деп хабарлайды QazNews.kz
Биыл жақсы жолдың үлесін 92%-ға дейін жеткізу үшін 250 шақырымдық 274 көшені жөндеу жоспарланған. Өткен демалыс күндері Құлжа тас жолының бір бөлігі, Тұрғұт Өзал және Жандосов көшелері ашылды. 20 магистральдық көшені жөндеу кезінде жол төсемінің беріктігін арттыру үшін полимерасфальтбетон қолданылады. Жөндеуден өткен аумақта жол белгілері 15-20 күннен кейін сызылады. Ол белгілерді де, жолдың сапасын да, тіпті, жол төсеу кезіндегі технология мен құрылыс материалдарының сапасын Жол активтері сапасының ұлттық орталығы Алматы филиалының мамандары қадағалайды.
“Алматыда жолдарды орташа жөндеу жұмыстары басталғалы біздің мекеме инженерлері процессті үздіксіз бақылауда. Жол желісін жаңа асфальтбетон төсеуге дайындаудан бастап, құрылыс аяқталғанша тексереді. Бұл жұмыстың барлығы тапсырыс беруші мен біздің орталық арасындағы келісімшарт негізінде жүзеге асады. Ал сапаны тексеру барысында анықталған кез келген олқылық, нормаға сәйкес келмеу фактілері бірден тіркеліп, тапсырыс берушіге, мердігер мекемеге, барлық жауапты орындарға жолданады”, — дейді ЖАСҰО Алматы филиалының директоры Мәулен Әліпов.
Биыл Алматыдағы жол желілеріндегі, жолайрықтардағы құрылыс жұмыстарын Сыбайлас жемқорлыққа қарсы қызмет те ерекше назарға алған. Сондықтан аталған мекеме мен сапаны бақылаушы орталық қызметкерлері нысандарды аралау жұмыстарын жиі-жиі жүзеге асыруда.