Қазақстан Республикасының Орталық сайлау комиссиясы аумақтық сайлау комиссиялары ұсынған мәліметтерге сәйкес, бүгін таңғы сағат 07:00-дегі жағдай бойынша еліміздің 20 өңірінде 10 363 сайлау учаскесі дауыс беруді бастағанын мәлімдеді, деп хабарлайды Qaznews.kz.
Сонымен қатар, шетелдегі 16 мемлекетте орналасқан 19 сайлау учаскесінде де дауыс беру процесі басталды.
Осылайша, Қазақстан тарихындағы алғашқы Құрылтай сайлауы ресми түрде өз жұмысын бастады.
Аумақтық сайлау комиссияларының шешіміне сәйкес, 107 сайлау учаскесінде дауыс беру жергілікті уақыт бойынша таңғы сағат 06:00-де ашылған.
Сайлаушылар тізіміне жалпы саны 12 605 788 азамат енгізілген. Оның ішінде 17 132 адам өз елді мекенінен тыс жерде дауыс беру құқығын беретін есептен шығару куәлігін алған.
Ел бойынша барлығы 10 423 сайлау учаскесі жұмыс істейді. Оның 79-ы шетелдегі 61 мемлекетте орналасқан.
Орталық сайлау комиссиясының мәліметінше, бір сағаттан кейін Қазақстан Республикасы Сыртқы істер министрлігі шетелдегі сайлау учаскелерінің ашылуы туралы ақпарат береді.
Сондай-ақ, бүгін сағат 10:00-ден бастап ОСК әр екі сағат сайын сайлаушылардың дауыс беруге қатысуы жөніндегі жедел мәліметтерді жариялап отырады.
