Алматы қаласында тоғызқұмалақ спортынан мектеп оқушылары арасында әлем чемпионаты аяқталды. Бірнеше күнге созылған әлемдік додада Алматы облысының шеберлері 2 алтын, 4 күміс медаль жеңіп алды, деп хабарлайды Qaznews.kz
Ұлттық зияткерлік ойындардың ең көне әрі терең мағыналы түрі – Тоғызқұмалақ биыл тағы да әлемдік деңгейдегі спорт мерекесіне айналды. Биыл 17–23 қараша аралығында Алматы қаласында жасөспірімдер (U-15, U-17) арасындағы тоғызқұмалақтан Әлем чемпионатына дүниежүзінің 21
мемлекетінен ойыншылар келді.
Бұл жарыс классика (онлайн және офлайн), рапид және блиц форматтарында
ұйымдастырылды. Әлемнің түкпір-түкпірінен жиналған жас спортшылар зияткерлік
шеберліктерін сынап, ұлттық ойынды халықаралық деңгейде насихаттайтын мүмкіндік алды.
Турнир барысында еліміздің ең үздік төрешілері мен мамандары қызмет атқарды. Жарыс жеңімпаздары мен жүлдегерлері арнайы кубоктармен, медальдармен және дипломдармен марапатталды.
Әлемдік жарысқа қатысып, ел намысын қорғаған Алматы облысының мақтаныштары: Есентай Арсен 1 алтын, 1 күміс, Ақнұр Мақсатқызы 1 алтын, Дәулетбек Томирис 3 күміс медаль жеңіп алды.
Тоғызқұмалақ – тек ойын емес, ол ұлттың ойлау мәдениетін, даналық дәстүрін әлемге паш
ететін мұра. Бұл чемпионат – жас ұрпақтың интеллектуалдық әлеуетін арттырып,
қазақстандық спорттың абыройын биіктететін маңызды қадам болмақ.
Чемпионат алғаш рет 2023 жылы Алматы қаласында ұйымдастырылды. Оған 17 мемлекеттен 136 спортшы қатысқан. Биыл 21 мемлекеттен 180 тоғызқұмалақ шебері бақ сынады.