Женевада Вашингтон мен Киев арасындағы бейбіт келісімді даярлауға бағытталған келіссөздер аяқталды, деп жазады QazNews.kz
Осы уақытта The Telegraph газеті АҚШ президенті Дональд Трамптың бастамасына жауап ретінде әзірленген Еуропалық одақтың Украинадағы соғысты тоқтату жоспарының толық мәтінін жариялады. Құжат 24 тармақтан тұрады.
«Ақылтай news» мәліметінше, ЕО Ресей мен Украинаны құрлықта, әуеде және теңізде атысты толық тоқтатуға шақырады. Сондай-ақ атысты тоқтату режимін бақылауға үшінші елдерді тарту үшін келіссөздер жүргізуді ұсынады. Мониторингті АҚШ жетекшілігіндегі Украина одақтастары спутниктер мен дрондар арқылы қашықтан жүзеге асыруы қарастырылған.
Жоспарда Мәскеу мен Киев тұтқындарды «бәрін бәріне» қағидасы бойынша толық алмастыруы тиіс екені көрсетілген. Бұдан бөлек, Ресей қамауда ұстап отырған барлық бейбіт азаматтарды босатуы қажет. Территориялық мәселелер бойынша кез келген келіссөз атысты толық тоқтатқаннан кейін және қазіргі соғыс шебі бойымен жүргізіледі.
Жоспарға сәйкес, Украинаға АҚШ пен бірнеше еуропалық елдерді қамтитын топ арқылы құқықтық тұрғыда бекітілген қауіпсіздік кепілдіктері беріледі. Бұл кепілдіктер НАТО Жарғысының 5-бабына ұқсас сипатқа ие болмақ. Украина Қарулы Күштері мен қорғаныс өнеркәсібіне ешқандай шектеу қойылмайды, ал ел өз аумағында одақтас күштерді орналастыру құқығын алады.
Құжат Украина ЕО-ға мүше болатынын, ал НАТО-ға кіруі альянсқа мүше барлық мемлекеттердің келісімі болған жағдайда мүмкін екенін атап өтеді. Сондай-ақ Украина АҚШ-тың қатысуымен Запорожье АЭС-і мен Каховка су электр станциясын бақылауды қайта алады — бұл үшін арнайы халықаралық бақылау механизмі жасалады.
Жоспарда Украина толық қалпына келтіріледі және соғыс салдарынан келген шығын өтеледі. Бұл өтемақы Ресей активтері есебінен де жүзеге асуы мүмкін. Ресейдің активтері Украинаға келтірілген зиян толық өтелмейінше бұғаттаулы күйінде қалады. Санкциялар тұрақты бейбіт келісім орнаған жағдайда кезең-кезеңімен жеңілдетіледі, ал келісім бұзылған жағдайда қайта енгізіледі.