Қазақстан бойынша 228 мәслихатқа барлығы 3 447 депутат сайлау жоспарланған. Олардың өкілеттік мерзімі – бес жыл. Депутаттар жалпыға бірдей, тең және төте сайлау құқығы негізінде жасырын дауыс беру арқылы сайланады, деп хабарлайды qaznews.kz.
Мандаттардың 668-і – 20 облыстық мәслихатқа, 626-сы – 38 қалалық мәслихатқа, ал 2 153-і 170 аудандық мәслихатқа тиесілі.
Орталық сайлау комиссиясының мәліметінше, кандидаттарды ұсыну, соның ішінде өзін-өзі ұсыну кезеңі 14 қазанда басталып, 27 қазанда сағат 18:00-де аяқталады. Партиялық тізімдер мен кандидаттарды тіркеу 1 қарашада сағат 18:00-ге дейін жалғасады.
Сайлау алдындағы үгіт 1 қарашада сағат 18:00-де басталып, 28 қарашада сағат 00:00-де тоқтатылады.
28 қараша – тыныштық күні.
29 қараша – сайлау өтетін күн.
