Қырғызстанда Қамшыбек Тәшиев қызметінен босатылды, деп жазады QazNews.kz
Қырғызстан президенті Садыр Жапаров Қамшыбек Тәшиевті Ұлттық қауіпсіздік мемлекеттік комитетінің (ҰҚМК) төрағасы әрі премьер-министрдің орынбасары қызметінен босату туралы жарлыққа қол қойды.
Қамшыбек Тәшиев ҰҚМК төрағасы қызметін 2020 жылғы 16 қазаннан бері атқарып келген. Ол бұл лауазымға 2020 жылғы 5–6 қазан күндері елде орын алған саяси оқиғалардан кейін, президент Садыр Жапаровтың қолдауымен тағайындалған болатын.
Қырғызстандық бұқаралық ақпарат құралдарының мәліметінше, Қамшыбек Тәшиев пен Садыр Жапаров арасындағы саяси одақ ұзақ уақыт бойы қалыптасқан және елдегі ең ықпалды әрі сенімді саяси тандемдердің бірі ретінде бағаланған. Тәшиев күштік құрылымдардың жұмысын үйлестіріп, резонансты істерге жетекшілік еткен, сондай-ақ президенттің жақын серіктестерінің бірі саналған.
Сонымен қатар Ұлттық қауіпсіздік мемлекеттік комитеті төрағасының уақытша міндетін атқару Жұмғалбек Шабданбековке жүктелді. Ол 2020 жылдан бері ҰҚМК-нің 9-қызметін басқарған және төрағаның орынбасары қызметін атқарып келген.
Қазіргі таңда Тәшиевтің қызметтен босатылу себептері бойынша ресми түсініктеме берілген жоқ.
