Қазақстанда қайтарылмайтын билет түрін алып тастау қарастырылып жатыр. Егер бұл норма қабылданса, авиабилеттердің құны өсуі ықтимал. Бұл туралы Үкіметтегі брифингте көлік вице-министрі Талғат Ластаев мәлімдеді, деп жазады QazNews.kz
Еске салайық, 2023 жылы билетті 100% қайтаруға болмайтын талапты жою бастамасы көтерілген еді. 2024 жылдың қыркүйегінде Мәжіліс «Тұтынушылардың құқықтарын қорғау туралы» заң жобасын бірінші оқылымда мақұлдады. Құжатта осы норманы енгізу қарастырылған.
Вице-министрдің айтуынша, толық қайтарылатын билет енгізілсе, шығын авиакомпания емес, басқа жолаушылардың тарифіне қосылуы мүмкін.
— Егер билет толық қайтарылатын болса, компенсация шығындары рейске келген басқа жолаушыларға бөлінеді. Өйткені авиакомпаниялардың жалғыз табыс көзі — билеттің құны. Сондықтан бұл шығындар тарифтерге әсер етіп, бағаның өсуіне әкелуі мүмкін, — деді Ластаев.
Қазір министрлік бұл норманы Мәжіліс және сарапшылармен талқылап жатыр. Мақсат – қандай жағдайларда билет құнын толық қайтару керектігін, ал қай кезде халықаралық тәжірибені қолдану қажеттігін нақтылау.