Премьер-министрдің орынбасары Қанат Бозымбаев Ұлытау облысының су тасқыны маусымына қаншалықты дайын екенін бақылап шықты. Жұмыс сапары кезінде ол Жезді өзенінің арнасындағы жағдайды қарап, Қарсақпай, Сарлық, Қорғасын, Бозтұмсық және Малшыбай ауылдарын су тасқынынан қорғау мақсатында атқарылып жатқан жұмыстармен танысты. Сонымен қатар Қарсақпай мен Кененбай бөгеттерінің жай-күйін тексерді. Жезқазған қаласында ол Кеңгір су қоймасына барып, қала әкімі қазіргі жағдай туралы баяндама жасады, деп жазады QazNews.kz
Облыс бойынша су басу қаупі бар 27 елді мекен анықталған. Соның ішінде сегізінде қауіп әлі де сақталып тұр, ал қалған 19 ауылда жүргізілген инженерлік және алдын алу шараларының арқасында қауіп айтарлықтай азайған.
Су тасқынына дайындық барысында өңірде 1,6 шақырым қорғаныс дамбасы тұрғызылды. Сонымен бірге 3,5 шақырым канал, 3 шақырым арық және 350 су өткізу нысаны тазартылды. Қазір Сарысу, Жаман Сарысу, Талдысай, Қаракеңгір, Жезді өзендері, сондай-ақ Кеңгір, Ақтасты және Жезді су қоймалары тұрақты бақылауға алынған.
Төтенше жағдай туындаған кезде жедел әрекет ету үшін арнайы техника, инертті материалдар және басқа да қажетті қорлар дайындалды. 1 наурыздан бастап азаматтық қорғау қызметтері мен күштері жоғары дайындық режиміне көшті.
Қанат Бозымбаевтың айтуынша, өңірдегі гидрометеорологиялық жағдай әзірге тұрақты. Алайда кез келген өзгеріске дереу жауап беріп, қауіпті аймақтарды тәулік бойы бақылауда ұстау қажет. «Қазгидромет» болжамына сәйкес Сарысу мен Кеңгір өзендерінде су деңгейі қауіпті шекке дейін көтерілуі мүмкін. Әсіресе Жаңаарқа ауданында қауіп жоғары, ал Ұлытау ауданында орташа деңгейде. Сондықтан Сарысу мен Тереңбұтақ өзендерінің арналарын тазарту жұмыстарын жеделдету керек.
Сапар қорытындысы бойынша вице-премьер облыс әкімдігіне тиісті мекемелермен бірге елді мекендерді су тасқынынан қорғау бойынша алдын алу шараларын күшейтуді тапсырды. Атап айтқанда, қысқа мерзім ішінде өзен арналары мен су өткізу нысандарын тазарту жұмыстарын аяқтау, су деңгейін тұрақты бақылауда ұстау, гидротехникалық құрылыстардың дайындығын тексеру және жағдай қиындаған жағдайда тұрғындарды эвакуациялау жоспарларын жаңарту міндеті қойылды.
