Алматы қаласында отандық ғылыми әзірлемелер негізінде өндірістік қалдықтардан құрғақ құрылыс қоспаларын өндіретін жаңа зауыт іске қосылды. Бұл жоба Satbayev University ғалымдарының қатысуымен және еліміздің бірқатар жоғары оқу орындары мен ғылыми ұйымдарының бірлескен еңбегінің нәтижесінде жүзеге асырылды, деп хабарлайды QazNews.kz
Жобаны жүзеге асыру барысында ғылыми топ толық циклді жұмыстарды атқарды. Атап айтқанда, жаңа материалдардың рецептураларын әзірлеу, тиімді шикізатты таңдау, технологиялық процестерді жетілдіру және дайын өнімді сериялық өндіріске енгізу кезеңдері толық қамтылды. Бұл – ғылым мен өндірістің нақты интеграциясының айқын көрінісі.
Жобаның басты ерекшелігі – жергілікті минералдық шикізатты және қайта өңделген өндірістік қалдықтарды тиімді пайдалану. Бұрын қалдық ретінде қарастырылған материалдар енді құрылыс индустриясы үшін құнды ресурсқа айналып отыр. Бұл өз кезегінде қоршаған ортаға түсетін жүктемені азайтып, өндірістің экономикалық тиімділігін арттыруға мүмкіндік береді.
Satbayev University профессоры, зерттеуші Руслан Нурлыбаев атап өткендей, жоба аясында жаңа құрылыс материалдарын өндіру технологиясы әзірленіп қана қоймай, ол өнеркәсіптік деңгейде сәтті енгізілген. Оның айтуынша, бұл – отандық ғылымның нақты нәтижеге бағытталған маңызды жетістігі.
Қолданылып отырған технологиялар патенттермен қорғалған. Ал дайын өнімдер жоғары беріктік сипаттамаларына ие болып, ұлттық стандарттарға толық сәйкес келеді және қажетті сертификаттардан өткен. Қазіргі таңда бұл құрылыс қоспалары отандық құрылыс компаниялары тарапынан қолданылып, олардың сапасы мен нарықтағы сұранысы дәлелденіп отыр.
Аталған DIATOMITE зауыты Satbayev University базасында құрылып жатқан ірі инновациялық жоба – TECHNOPARK STROYTECH құрамына кіреді. Бұл бастама Мемлекет басшысы Қасым-Жомарт Тоқаев берген тапсырмаға сәйкес, университеттер негізінде технологиялық парктер құру және ғылымды өндіріс саласына кеңінен енгізу мақсатында жүзеге асырылуда.
Ауқымды жоба ҚР Ғылым және жоғары білім министрлігінің қолдауына ие болған. Оған Satbayev University-мен қатар, Серікбаев атындағы Шығыс Қазақстан техникалық университеті, Әуезов атындағы Оңтүстік Қазақстан университеті, Металлургия және байыту институты және индустриялық серіктес SAVENERGY компаниясы қатысуда.
ҚР Ғылым және жоғары білім министрі Саясат Нұрбек бұл жобаның маңыздылығына тоқталып, оның ерекшелігі бірнеше қазақстандық жоғары оқу орны ғалымдарының бизнес өкілдерімен бірлесіп жұмыс істеуінде екенін атап өтті. Оның айтуынша, мұндай тәжірибе алдағы уақытта еліміздің барлық өңірлерінде кеңінен енгізіледі. Бұл университеттердің тек білім беру орталығы ғана емес, сонымен қатар индустриялық дамудың негізгі қозғаушы күшіне айналуына жол ашады.
Жаңа өндірістік алаңда оқу-зертханалық кешен де жұмыс істейді. Мұнда болашақ ғалымдар даярланып, магистранттар мен докторанттар ғылыми зерттеулерге белсенді қатысады. Сонымен қатар, инновациялық құрылыс материалдарын сынақтан өткізу жұмыстары жүргізіледі. Бұл ғылым мен өндіріс арасындағы байланысты нығайтып, кадр даярлау сапасын арттыруға ықпал етеді.
Алдағы уақытта жобаны одан әрі дамыту жоспарланған. Атап айтқанда, өнім түрлерін көбейту, өндіріс қуатын арттыру және енгізілген технологияларды Қазақстанның басқа өңірлеріндегі ұқсас зауыттарда қолдану көзделіп отыр.
