Алматы облысы Жамбыл ауданы Беріктас ауылында оқушының қаза табуына қатысты полиция ресми түсініктеме берді, деп жазады QazNews.kz
Полиция мәліметінше, 2026 жылғы 8 қаңтарда орын алған оқиға бойынша абайсызда адам өліміне әкеп соққан денсаулыққа қасақана зиян келтіру дерегімен сотқа дейінгі тергеп-тексеру жүргізіліп жатыр.
Жедел-іздестіру іс-шаралары барысында кәмелетке толмаған күдікті ұсталып, заңнамада белгіленген тәртіппен уақытша ұстау изоляторына қамалған.
Алдын ала деректерге сәйкес, оқиға кезінде күдікті тарапынан соққы жасалған. Алайда полиция бұл мәліметтердің алдын ала сипатқа ие екенін атап өтті. Қазіргі таңда оқиғаға қатысушылар мен куәгерлердің көрсетулері, сондай-ақ тағайындалған сараптамалардың қорытындылары жан-жақты тексеріліп жатыр.
Сонымен қатар, бұған дейін тараған оқиғаның ақшаға байланысты болғаны жөніндегі ақпарат әзірге расталған жоқ. Бұл нұсқа да тергеу аясында тексерілуде.
Қазіргі уақытта оқиғаның барлық мән-жайын толық әрі объективті анықтауға бағытталған қажетті тергеу әрекеттері жүргізіліп жатыр. Қылмыстық іс Полиция департаменті басшылығының ерекше бақылауына алынған.
Еске салайық, бұған дейін Алматы облысы Жамбыл ауданы Беріктас ауылында оқушы қаза тапқанын жаздық. Алдын ала мәліметке сәйкес, екі оқушы бір баланы соққыға жыққан, салдарынан жасөспірім көз жұмған. Оқиғаның ақшалай келіспеушілік салдарынан туындауы мүмкін екені айтылады.