Алматыда алғашқы крематорийдің ашылуына дайындық жүріп жатыр. Қаладағы денсаулық сақтау басқармасы мәлімдегендей, құрылыс 6 жыл бұрын басталған, бюджеттен 1,5 миллиард теңге бөлінген. Журналист Гүлмира Әбіқай қоғамда пікірталас тудырған мәселеге өз ойын айтты, деп жазады QazNews.kz
Бұл қарапайым тұрғындар үшін жаңа тәжірибе.
«Қалада қазіргі таңда 70-ке жуық бейіт бар, бірақ кей жерлерде орын жетпейді. Кремация механизмі бойынша мәйіт арнайы ағаш табытқа салынып, 1000 градуста өртеледі. Егер протездер немесе импланттар болса, олар пештен кейін алынады. Бір мәйітті өртеп шығару шамамен екі сағатқа созылады, туыстарына тек күл салынған ыдыс беріледі», — деп түсіндірді журналист.
Діни тұрғыдан да пікірлер екіге бөлінеді. Мұсылманша дәстүр бойынша, тірі немесе өлі жанға құрмет көрсету маңызды, адамды өртеп жіберу рәсімі қабылданбайды. Сол себепті крематорийдің ашылуы – заң мен дәстүр арасындағы үйлесімділікті ойландыратын мәселе.
«Алматыдағы крематорий – қалалық жер тапшылығын шешудің бір жолы, бірақ дәстүр мен халық сенімін ескере отырып, қоғаммен ашық талқылау қажет. Бұл тек техника мен заң ғана емес, мәдениет пен рухани құндылықтарға қатысты мәселе», — деп жазды ол.
Еске салайық, Алматыда алғашқы крематорийдің іске қосылуына дайындық басталғанын жазған болатынбыз.