Алматыда алғашқы крематорийдің іске қосылуына дайындық басталды. Бұл туралы Қоғамдық денсаулық сақтау басқармасының баспасөз қызметі хабарлады, деп жазады QazNews.kz
Zakon.kz мәліметінше, 2026 жылғы 9 қаңтарда Әділет министрлігінде Ұлттық экономика министрлігінің жерлеу және қабірлерді күтіп-ұстау ісін ұйымдастырудың үлгілік қағидаларына өзгерістер енгізуді көздейтін бұйрығы тіркелді.
Жаңа ережелер крематорийлердің қызметіне құқықтық негіз қалыптастырып, Қазақстанда алғаш рет кремацияны заңнамалық деңгейде жүргізуге мүмкіндік береді.
Алматы қалалық Қоғамдық денсаулық сақтау басқармасының хабарлауынша, бұйрық күшіне енгеннен кейін крематорий барлық санитарлық және құқықтық талаптарды сақтай отырып жұмысын бастайды.
Сонымен қатар қазіргі уақытта кремация қызметтерінің бағалар тізімі қалалық патологоанатомиялық бюроның бақылау кеңесі арқылы бекітілу үстінде екені нақтыланды.
Айта кетейік, Алматыда крематорий салу жоспары алғаш рет 2020 жылдың жазында жарияланған болатын. Құрылыс аяқталғанымен, нысанды іске қосу бірнеше рет кейінге шегерілген.